Nú rétt í þessu var Eyþór Eiríksson að koma í mark í tímatökukeppni Evrópumótsins í götuhjólreiðum (U23) sem fer þessa dagana fram í Anadia, Portúgal.

Í samtali við fréttaritara Hjólreiðasambandsins sagðist Eyþór vera nokkuð sáttur með frammistöðu sína í dag. 
Brautin hafi verið skemmtileg og hröð með mjög tæknilegum köflum inn á milli, sérstaklega hafi verið nokkrir varhugaverðir kaflar í beygjum við hringtorg þar sem sandur hafi verið á brautinni. 

Mikill hiti er í Portúgal núna og var 37°C hiti þegar Eyþór atti kappi við tímann í Anadía nú rétt áðan. Til gamans má geta þess að í seinasta móti sem Eyþór tók þátt í, Íslandsmótinu á Mývatni 25. júní s.l. var hitastigið um 2°C.

Næst á dagskrá er svo götuhjólamótið sjálft næsta sunnudag (10. júlí), þar sem Eyþór og Matthías Schou Matthíasson munu taka þátt fyrir Íslands hönd. Íslenski hópurinn er búinn að fara í og skoða keppnisbrautina. Um er að ræða 23 km. hring sem farinn verður samtals 7 sinnum. Á hringnum eru tvö klifur, eitt stutt og bratt klifur og annað aðeins minna en lengra ca. 4 km. þar sem vænta megi mikillar keyrslu. Vonar Eyþór að hitinn úti verði eitthvað minni á sunnudaginn en hann var í dag.

Með þeim Eyþóri og Matthíasi eru Mikael Schou afreksstjóri og Margrét Arna Arnardóttir.

Úrslit og aðrar upplýsingar mótsins má finna hér.