Í dag var fyrsti keppnisdagur, en þá var keppt í karlaflokki undir 23 ára og áttum við þrjá keppendur þar. Davíð Jónsson, Baldur Þorkelsson og Breki Gunnarsson voru meðal 139 keppenda frá 38 þjóðum, en hjólaðir voru 142 kílómetrar frá Ljúblíana í átt að fjallendi í norðri þar sem þrír hringir voru hjólaðir, með mikilli hækkun og lækkun.

Strákarnir áttu góða byrjun á deginum en í keppni við einhverja af þeim bestu í heiminum getur margt gerst. Meðalhraðinn á hópnum fyrstu 75km var yfir 50km/klst og á leiðinni var slys þegar keppendur skullu saman og margir flugu á hausinn, en Baldur var þar á meðal. Hann slasaðist lítillega en varð að hætta keppni í kjölfarið. Breki hélt vel í hópinn framanaf en eftir um 85km varð hann að hætta keppni. Davíð komst 107km en var að glíma við veikindi og ákvað að hætta keppni til að eiga betri möguleika á árangri í seinni keppnisgreininni, tímatökunni, sem fer fram í næstu viku.

Á morgun keppa karlar undir 19 ára fyrri part dags, og seinni partinn keppa elite konur, og eigum við keppendur í báðum flokkum. Fyrir Íslands hönd munu Sólon Kári Sölvason, Einar Valur Bjarnason og Þorbergur Anton Pálsson keppa í U19, og Bríet Kristý Gunnarsdóttir í flokki elite kvenna.