Úrslit úr öðru bikarmóti sumarsins í fjallahjólreiðum.

Önnur umferð í bikarmótaröðinni í fjallahjólreiðum fór fram laugardaginn 12. maí. Sama dag fór fram almenningsmót í fjallahjólreiðum. Það voru hjólreiðafélagið Tindur og Krónan í samstarfi við Mjölni sem héldu mótið en það fór fram í Öskjuhlíð.  

Einungis einn keppandi var skráður í meistaraflokk kvenna, Halla Jónsdóttir, HFR. Hún hjólaði þrjá hringi og kom hún í mark á tímanum 01:13:25.  

Í meistaraflokki karla hafði Hafsteinn Ægir Geirsson, HFR, betur gegn Ingvari Ómarssyni, Breiðabliki sem lenti í öðru sæti. Í þriðja sæti var Bjarki Bjarnason, HFR. Karlarnir hjóluðu fimm hringi. Hafsteinn kom í mark á tímanum 01:26:45 og var Ingvar þremur mínútum á eftir honum. Eru þeir Hafsteinn og Ingvar jafnir að stigum nú þegar tvær umferðir eru búnar af mótaröðinni.  

Einn keppandi var í junior-flokki karla, en það var Dagur Eggertsson, Tindi, sem hjólaði tvo hringi á tímanum 00:47:18. Einnig var einn keppandi í U-17, Steinar Þór Smári sem hjólaði einn hring á tímanum 00:32:01.  

Í flokki drengja U15 var hjólaður einn hringur. Þar sigraði Fannar Freyr Atlason, Tindi. Í öðru sæti var Davíð Jónsson, HFR. Í þriðja sæti var Breki Blær Rögnvaldsson, HFR og í fjórða sæti var Snorri Karel Friðjónsson.  

Í almenningsmótinu hjóluðu bæði karlar og konur tvo hringi. Efstu þrjú sætin voru þessi: 

Konur:
1. Elsa Gunnarsdóttir, HFR
2. Sædís Ólafsdóttir, HFR
3. Hrafnhildur Sigurðardóttir, utan félags 

Karlar:
1. Oddur Steinn Einarsson, utan félags
2. Gunnar Örn Svavarsson, HFR
3. Eyjólfur Ari Bjarnason, utan félags 

Loks var haldið spark- og barnahjolamót. Voru 32 þátttakendur skráðir til leiks, en sparkhjólamótið var ætlað þátttakendum á aldrinum 2–5 ára og barnahjólamótið fyrir 6–12 ára. Stóðu allir sig þar með prýði og fóru heim með verðlaunapening.  

Öll úrslit má sjá á timataka.net.