Hjólamenn standa fyrir nýrri hjólreiðakeppni í sumar.

Undanfarin 3 sumur hafa Hjólamenn staðið fyrir Snæfellsneshringnum þar sem hjólaður hefur verið hringur í kring um Snæfellsnesið frá Vegamótum.  Í ár verður þessar keppni breytt verulega, má í raun tala um alveg nýja keppni,  og hefur hún hlotið heitið Jökulmílan.  Startað verður frá Grundarfirði 15. júní og hjólaður rangsælis hringur í kring um Snæfellsnesið.

Jökulmílan er lengsti einstaklingsmiðaði hjólreiðaviðburðurinn sem er skipulagður árlega á Íslandi.  Hringurinn meðfram strandlengju Snæfellsnes, vestur fyrir Jökul og til baka um Vatnaleið er 160,9 km langur, eða nákvæmlega 100 mílur.  Jökulmíluna er því með sönnu hægt að kalla "Aldarskeið" eða á ensku "Century Ride" sem er vinsæl tegund hjólreiðaviðburða vestanhafs.  Hjólamenn vilja höfða til breiðs hóps hjólreiðmanna eins og gjarnan er með slíka viðburði.  Við skorum á þig að reyna "Míluna" á þínum eigin forsendum óháð því hvað aðrir kynnu að hjóla hana hægt eða hratt. 

Boðið verður upp á eftirfarandi flokka:

Forræsing kl. 9:00.  Fyrir náttúruunnendur á fjalla- eða götuhjólum

Keppnisflokkur kl. 11:00

Þríþrautarflokkur kl. 11:10

Hálf Jökulmíla (startað frá Búðum) kl. 13

Fjarðarsprettur.  Hjólaþraut fyrir 8 til 16 ára kl. 14 í Grundarfirði.

Allir áhugamenn um hjólreiðar ættu því að geta fundið eitthvað við sitt hæfi á Snæfellsnesinu 15. júní næstkomandi!

Allar nánari upplýsingar á vefsetri Jökulmílunnar.