Heimsmeistaramótið í Maraþon fjallahjólreiðum fór fram í Haderslev í Danmörku í dag. Íslandsmeistarinn Ingvar Ómarsson var á meðal þeirra 142 keppanda frá 33 löndum sem hófu keppni og startaði í 62. sæti.

Ingvar endaði keppnina í 82. sæti á tímanum 4:39:56 sem var 23 mínútum á eftir sigurvegara dagsins og heimsmeistara Samuel Gaze frá Nýja Sjálandi.

Í samtali sagði Ingvar að keppnin hafi hafist með miklum látum strax í byrjun þar sem mörgum hafi legið lífið á að komast sem fyrst fremst í keppendahópinn. Það hafi verið í takti við brautina og væntingar Ingvars þar sem mikilvægt hafi verið að komast strax á meðal fremstu manna. Þó kvaðst Ingvar fljótt hafa fundið það að hann hafi ekki haft nægilega góðar lappir í þennan æsing í startinu í dag. 

Úr varð að mjög stór hópur náði að slíta sig frá restinni og sat Ingvar eftir í minni hóp þar fyrir aftan. Í þeim hafi verið nokkuð gott samstarf og leið Ingvari vel þar en hann hafi strax áttað sig á því að þessi minni hópur væri aldrei að fara að ná að brúa bilið á stóra hópinn fyrir framan. Því hafi eina í stöðunni verið að sitja sem lengst í þessum hóp og reyna að týna upp keppendurna sem duttu úr hópnum fyrir framan.

Þegar líða fór á keppnina fór Ingvar aðeins að finna lappirnar, til marks um það þá var hann í 100. sæti eftir fyrsta hringinn. Á öðrum hring kemur hann sér upp um 7 sæti og svo á seinasta hring kemur hann sér svo upp um 11 sæti til viðbótar. Ingvar segist þakkar þetta því að hann hafi haft góða aðstoð í brautinni sem sé eitthvað sem hann sé ekki vanur. Þau Ragnheiður Eyjólfsdóttir og Hafsteinn Ægir Geirsson hafi verið Ingvari til aðstoðar í brautinni og komið til hans næringu og vatni sem hafi hjálpað mikið, sérstaklega þegar á keppnina leið þar sem næring í braut skipti svo miklu máli í svo langri keppni eins og maraþon fjallahjólreiðakeppnir eru.