Landsliðs- og afreksdeild Hjólreiðasambands Íslands boðar árlega til hæfileikabúða fyrir efnilegasta hjólreiðafólk landsins.

Um seinustu helgi voru hæfileikabúðirnar haldnar á Ísafirði með góðri aðstoð heimamanna í Vestra Hjólreiðadeild. Dvalið var í Skíðaskálanum í Tungudal sem sannarlega er paradís fjallahjólarans.

Búðirnar eru hugsaðar fyrir fremsta hjólreiðafólk landsins í flokkum U17, U19 og U23.  Í ár var eingöngu horft til þeirra sem stunda fjallahjólreiðar. Voru æfingar undir handleiðslu Conor Campbell landsliðsþjálfara og var Þorgils Óttarr Erlingsson aðalþjálfari Hjólreiðadeildar Vestra honum innan handar.

Einnig kíkti Snorri Einarsson, Ólympíufari og margverðlaunaður skíðagöngumaður í heimsókn til okkar og talaði um vegferð sína og reynslu í sínu sporti.

Hjólreiðasambandið þakkar Vestra innilega fyrir gestrisnina og aðstoðina við hæfileikabúðir ársins.