Þá er Evrópumeistaramótinu í fjallabruni lokið en mótið fór fram í Les Menuires í frönsku ölpunum, dagana 18. - 20. ágúst, við mjög krefjandi aðstæður þar sem m.a. hitinn fór upp í 34 gráður yfir miðjan dag.

Heildarfjöldi keppenda var í hærra lagi en alls voru 520 keppendur skráðir til leiks og var því brautin, sem er virkilega hröð og krefjandi, fljót að grafast illa. Það var mikið öngþveiti í æfingaferðum og mjög þétt á milli keppenda sem sáu oft lítið vegna ryks sem þyrlaðist upp og lá yfir brautinni í logninu. 

Brautin sem er um 2,5 km. að lengd, liggur ofan trjálínu í grýttu landslagi í um 2000 metra hæð. Hún tók sinn toll en rétt rúmlega 470 keppendur náðu að klára og var þyrlan óþægilega oft á lofti að sækja slasaða keppendur í brautinni.

Íslensku keppendurnir Anton Sigurðarsson (BFH), Sól Snorradóttir (HFR) og Björn Andri Sigfússon (HFA) leystu verkefnið gríðarlega vel af hendi. Þau hjóluðu þétt en örugglega og skiluðu sér niður og kláruðu keppnina. 

Það var gaman að fylgjast með keppendum þessa daga en það er greinilegt að æfinga- og keppnisferðalagið sem Sól og Björn Andri hafa verið á um Evrópu er að skila sér. Anton varð hins vegar fyrir því óláni að detta við æfingar stuttu fyrir mótið og var hægri hendi og öxl ekki búin að ná sér.

Hópurinn heldur heim á leið í dag og við tekur bikarmót í fjallabruni síðar í vikunni sem haldið verður í Úlfarsfelli þann 26. ágúst n.k. 

Við hvetjum sem flesta til að koma og fylgjast með skemmtilegri keppni.