Í dag fór fram keppni í Evrópumótinu í götuhjólreiðum í U23 flokki hér í Limburg, Belgíu. Fyrir Íslands hönd tóku þátt þeir Daníel Freyr Steinarsson, Björgvin Haukur Bjarnason, Breki Gunnarsson og Davíð Jónsson.

Hjólað var frá Hjólreiðahöllinni í Heusden-Zolder sem leið lá í gegnum borgina Hasselt, þaðan var hjólað suðureftir þar sem teknir voru 2 hringir áður en aftur var komið inn í Hasselt.

Hraðinn í keppninni var gríðarlegur eða rétt tæpir 48 km./klst. meðalhraði á fremstu mönnum. Af þeim sökum náðu, af þeim 147 keppendum sem skráðir voru til leiks í upphafi dags, aðeins 101 að klára keppnina. Engin okkar manna náði að koma sér yfir endamarkið að þessu sinni. 
Klárlega munu okkar menn taka reynslu dagsins með sér í framtíðarverkefni sín. Framtíðin er þeirra.

Á morgun er svo komið að keppni í Elíte flokki kvenna. Þar eigum við 3 keppendur, en þau Silja Jóhannesdóttir, Bríet Kristý Gunnarsdóttir og Hafdís Sigurðardóttir eru skráðar til leiks.
    
Sýnt er frá keppninni í beinu streymi af síðu UEC.
Keppnin hefst klukkan 13:30 að staðartíma.